“Aznewstv” xəbər verir ki, bunu Polşanın XİN başçısı Radoslav Sikorski deyib.
Nazir hesab edir ki, NATO-nun etirazına baxmayaraq, Polşa Rusiya raketlərini Ukraynanın hava məkanında vurmalı, bununla da özünə qarşı mümkün təhlükəni önləməlidir.
Onun sözlərinə görə, Ukrayna ərazisi üzərində raketlərin vurulmasının NATO-nu Rusiya ilə müharibəyə sürükləyə biləcəyi qorxusuna baxmayaraq, Varşava öz vətəndaşlarının təhlükəsizliyini təmin etməyə borcludur: “NATO-ya üzvlük hər bir ölkənin öz hava məkanının mühafizəsi məsuliyyətini inkar etmir – bu, bizim öz konstitusiya məsuliyyətimizdir”.
Xatırladaq ki, bu yay Polşa Ukrayna ilə ikitərəfli təhlükəsizlik sazişi imzalayıb və bu sazişdə iki ölkə “Ukrayna hava məkanında Polşa ərazisi istiqamətində buraxılan raket və PUA-ların vurulması imkanlarının öyrənilməsini” qeyd ediblər. Lakin NATO-nun Baş katibi Yens Stoltenberq bu təklifi rədd edib, çünki bu, alyansı “münaqişənin bir hissəsinə çevirə bilər”.
