Bu üslub, qədim türk melodiyalarını, ritmlərini və musiqi alətlərini müasir tərzdə birləşdirərək türk musiqisinin yeni nəfəsi olmağı hədəfləyir.
“Öz Türk” mahnıları və ya musiqisi, qədim və müasir türk ritmlərinin, melodiyalarının və musiqi alətlərinin sintez olunduğu bir musiqi növüdür. Bu üslub, həm qədim türklərin, həm də müasir dövrdə yaşayan türk xalqlarının istifadə etdiyi musiqi alətlərindən faydalanaraq min illər boyu formalaşmış və inkişaf edib.
Necə ki, Azərbaycan musiqisində pop, caz, rok və hip-hop üslubları ənənəvi xalq və muğam musiqisi ilə sintez olunur, bəs nə üçün türk mahnılarının ifasında müxtəlif türk musiqi üslublarının və ənənələrinin birləşməsindən istifadə etməyək? Son illərdə bəzi sənətçilərin qədim türk ritmlərini, melodiyalarını və təbiətdən ilhamlanan səsləri öz musiqilərində tətbiq etməsi böyük maraq və rəğbətlə qarşılanıb.
Musiqi tarixin müxtəlif mərhələlərində müxtəlif üslubların, ifa tərzlərinin və alətlərin geniş spektrinə sahib olmuşdur. Onun formalaşmasında mədəni, sosial və iqtisadi amillər mühüm rol oynamışdır. Bu gün musiqi duyğuların ifadəsi və fərqli mədəniyyətlərin bir-biri ilə ünsiyyət qurması üçün qlobal bir dilə çevrilib. Sözsüz bir incəsənət növü kimi musiqi, insan düşüncələrini və təcrübələrini ifadə etmək gücünə malikdir və mədəni əlaqələri daha da gücləndirir.
Qloballaşan dünyada musiqi üslublarının sintezi və texnologiyanın inkişafı yeni musiqi janrlarının yaranmasına səbəb olub. Müxtəlif üslubların qarışdırılması, yenilikçi yanaşmalar və texnoloji imkanlar sənətçilərə sərhədləri aşaraq yeni üslublar yaratmağa və mədəni əlaqələri möhkəmləndirməyə imkan verir.
Yeni bir musiqi üslubu yaratmaq üçün sənətçilər öz fikirlərini və hisslərini musiqiyə köçürməli, mədəni irslərindən və şəxsi təcrübələrindən ilham almalıdırlar. Fərqli ifa tərzlərinin gözlənilməz şəkildə birləşdirilməsi, ənənəvi və müasir musiqi alətlərinin sintezi, həmçinin müxtəlif musiqiçilərlə əməkdaşlıq unikal üslubların yaranmasına təkan verə bilər.
Türk musiqisinin sintezi müxtəlif məqsədlərə xidmət edir: innovativ sənət nümunələri yaratmaq, mədəniyyəti yüksəltmək, insanlar arasında birlik və həmrəyliyi gücləndirmək, dinləyicilər üçün yeni musiqi təcrübələri təqdim etmək. Bu üslub, mədəni əlaqələri daha da inkişaf etdirərək cəmiyyətlər arasında mədəni mübadilənin genişlənməsinə kömək edə bilər.
“Öz Türk” ifadəsi türk dilində bir millətin orijinallığını və tarixi ilə olan bağlarını vurğulayan bir anlayışdır. Sənətdə bu ifadə, türk xalqlarının milli dəyərlərini, kimliyini və irsini əks etdirən simvola çevrilmişdir. Bu konsepsiyadan ilhamlanan musiqi əsərləri cəsarət, gözəllik, təbiət sevgisi və türk mədəniyyətinə bağlılıq kimi xüsusiyyətləri sərhədləri və dilləri aşaraq dünyaya təqdim edəcək.
