شاهید اولدوغوموز کیمی، آزربایجان‌لی قادینلارین اؤنجوللویونده اورمیه گؤلونون قصدن قورودولماسینا قارشی خالق اعتراضلاری هر کئچه‌ن گون داها گئنیش وسعت آلیر.
تبریز ده داخیل اولماقلا آزربایجان شهرلرینده ایشسیزلیک، یوکسک تورم، سو بحرانی و گونئی آزربایجانین میللی وارلیغینا بؤیوک تهدید اولان اورمیه گؤلونون قصدن قورودولماسی آزربایجان تورک میللتی‌نین بوتون سوسیال طبقه‌لرینه تأثیر ائدیر.
قادینلار، صنعتچیلر، گنجلر و حتی میللتین دیندار جمعیتی ده یاخشی باشا دوشورلر کی، ایران‌دا اؤتن عصرده حیاتا کئچیریله‌ن داخیلی موستملکه‌چیلیک سیاستی بیر میللتین تملینی و وارلیغینی هدفه آلیب.
اورمیه گؤلونون بویوک ائکولوژی بحرانی، قیزیل، میس، اورانیوم کیمی یئرالتی معدنلرین تالان ائدیلمه‌سی و آزربایجان مئشه‌لرینین محو ائدیلمه‌سی، گونئی آزربایجان خالقینا قارشی موستملکه‌چی و استبدادی سیستئمینین سیاستلرینین بیر پارچاسیدیر..
آجیناجاقلی وضعیت او حده چاتیب کی، تاریخ بویو آزادلیغین و معاصیرلیین بایراقداری اولان تاریخی تبریز شهرینده اینسانلار تانکئرلردن سو ایچمک مجبوریتین‌ده قالیب.
بیز آزربایجانین سیاسی تشکیلاتلاری گونئی آزربایجانین حیاتینین و میللی وارلیغینین هدفه آلیندیغی بو حساس و قارماشیق وضعیتده و ۱ سایلی بیلدیریده ده قئید ائتدییمیز و وورغولادیغیمیز کیمی، بو وضعیته اعتراض ائتمه‌یی اینسانلیق گؤره‌وی و هر بیر آزربایجانلی‌نین دوشونجه‌سی و صینفیندن آسیلی اولمایاراق، میللی بورجو اولدوغونا اینانیریق.
گونئی آزربایجان شهرلرینین میدانلاریندا و کوچه‌لرینده اورمیه گؤلونون قصدن قورودولماسینا اعتراضلارین کئچیریلمه‌سینین ائتکینلیینه و تاریخی اهمیت داشیدیغینا اینانیریق. اونا گؤره ده، موختلیف اصول و تاکتیکلرله کئچیریله‌ن بوتون اعتراضلارلا یاناشی، «5 شهریور»ده کئچیریله‌جک اعتراضلاری آزربایجان تورک میللتی‌نین دانیلماز حاقی حساب ائدیریک.
آزربایجان باخیش آچیسیندان ایسلام جمهوریتی تکجه مورتجع و قادینا قارشی مذهبی توتالیتار رئژیم اولماقلا قالماییب، هم ده سون ۴۴ ایلده ایران‌دا مظلوم میللتلره قارشی موستملکه‌چیلیک سیستئمینین سیاستلرینی حیاتا کئچیره‌ن بیر رئژیمدیر. آزربایجان تورک میللتی‌نین ایران‌داکی دیگر مظلوم میللتلرله بیرلیکده موستملکه‌چیلیکدن قورتولماق اوچون مشهور «آزادلیق، عدالت، میللی حؤکومت» شوعاریندا تظاهر ائد‌ن میللی حؤکومت قورماقدان باشقا چاره‌سی یوخدور.
گونئی آزربایجان میللی حرکتی‌نین سیاسی تشکیلاتلاری اولاراق، بوتون ساحه‌لرده فعال ایشتیراک ائد‌ن بوتون موباریزلره، میللی فعاللارا، او جمله‌دن آزربایجانین اؤنجول قادینلارینا، قورخماز گنجلره تشککور ائتمکله یاناشی، بیر داها بوتون آزربایجان میللتینی 5 شهریور تاریخینده اورمیه گؤلونون قصدن قورودولماسینا قارشی کوتلوی اعتراضلارا چاغیریریق.
یاشاسین آزادلیق
یاشاسین عدالت
برقرار اولسون دئموکراتیک میللی حکومت
