اوستاد «آشیق قافار ابراهیمی» گۆنش ایلی ۱۳۳۳-ده آذربایجانین گؤزل یوردو قاراداغ بؤلگه‌سی‌نین «مئشه پارا» ماحالیندا دۆنیایا گؤز آچمیشدیر. چوْخ گنج چاغلاریندان آشیق صنعتی و موسیقی‌سی ایله ماراقلانیب بو صنعت ده فعالیته باشلامیشدیر. اوستادلاریندان «آشیق رسول قربانی»، «آشیق حسن غفاری» و «آشیق علسگری» ساناماق اوْلار. حیاتی بوْیونجا بیر چوْخ ادبی محفل‌لرده فعالیت گؤسترمیش و بعضی ادبی انجمن‌لرین ده مؤسس‌لریندن اوْلموشدور، اوستاد اوروپادا، سوئد و سوئیس کیمی اؤلکه لرده آشیق موسیقی‌میزی لاییقینجه تمثیل ائتمیشدیر، تۆرکیه ده و آذربایجان جمهوریتینده دفعه‌لرلجه آشیق سمپوزیوملاریندا اشتراک ائتمیشدیر. باکی‌دا آشیقلار بیرلیگی‌نین عضوو و ایراندا آشیقلار ائوی‌نین عضوو و آغساققالی اوْلاراق مختلف استانلاردا سمینار و کنگره‌لرین اشتراکچی‌سی اوْلموشدور.
رحمتلیک آشیق قافار ۲۵ کیتابین یازاری‌دیر و اوْنلاردان ساده‌جه ۴-ی چاپ اوْلوب و ایشیق اۆزۆ گؤرمۆشدۆر. کیتابلایندان: «ائل قوْشمالاری»، «سئوگی مقدس‌دیر» و «داغلار منیم اوْلدو من ده داغلارین» کیتابلارین ساناماق اوْلار.
رحمت لیک «آشیق قافار ابراهیمی»جنابلارینا اولو تانریدان رحمت دیله ییب و اوْنون ایل دؤنۆمۆنۆ بۆتۆن سایقی ایله آنیریق.
«مکانی اوچماق و یئنیدن آذربایجان میللتی نین باشی ساغ اوْلسون دئییریک»
