بو ندن‌له دیرلی یولداشیم مرتضی پروین-ین یئنی دۆزلتمیش هئیکل شونقار-ی دویغولاریم آچیسیندان باخیب یازیرام. ائوین دوستاغیندا گئجه گۆندۆز تانیمادان یوْخلوقلارا و قیسیت لارا باخمادان هر زامان بیر ایز بیر دامغا باسماق ایسته‌ین بیریسی دیر مرتضی. شونقار ایکیل «دوگانه» حئیوان «آصلان قارتال» بیریکیم «آمیزه» اوْلاراق اوسطوره لریمیزده یاشار.
گؤره‌نمه «سرافرازی»، شیشمه، اۇج، اؤزگۆرلۆک و گۆج سیمگه‌میزی اؤز یئنی باخیشی ایلا قاییریب اوْرتادا قالدیردی.
آنجاق باش سیز گؤوده؟!
مرتضی بیله‌رک باشسیز دۆزه‌لدیب دیر.
«باش سیز بدن اوچوروما دوْغرو گئدر» مرتضی نین داها دوْغروسو شونقارین اویاری سیدیر، کیمله‌لره؟ آنلایانلارا، باش بیلنلره و یوْل بولانلارا.
باش گؤرر، ائشیدر، دانیشار، ییه‌ر، ایچر، دۆشۆنر، بیله‌ر و بیلدیرر. کسین بوردا میللیت سیمگه‌سی سمبولو سؤز قوْنوسو دور. اؤزۆنۆ باش بیلن اؤز باشینالاردان دانیشیر. باش سیز، دۆشۆنجه‌سیز، دیلسیز توْپلوم اوْرتادا اؤزۆنۆ گؤسته‌ریر.
هئیکل گؤزل دئییل، بویاقسیز دیر، اۆره‌ک بولاندیراندیر. تام چیرکین بیله‌رک دن بو چیرکین لیک داها آپارتیلیب دیر. بوردا نه هایقیران آصلان وار و نه اوچان قارتال. آخساق قایریغی دیر. ایشیق یوخ، ایشیق سالان یوْخ، ساده‌جه باغیرانمایان، اوچانمازان بیر باش سیز هئیکل.
۲۲ نفر سئچگین و بیلگین سیاسی چالیشمان حضوروندا بو آچیلیش یئرینه یئتیریلدی، آلقیشا لاییق بیلدیردیلر. مرتضی پروین اؤز ایشینی بیلیر سؤیله‌دیلر سوْندا دئمه‌لییم مرتضی پروین هم بئینی ایله دۆشۆنۆر هم بارماقلاریلا. هر زامان اوْنا باشاری و اوغور دیله‌ییرم.
«محمود اوجاقلو» – ائوین دوستاغی – ۱۴۰۳/۱۲/۱۹
