گونئی آذربایجان تورک ملتینه ضد اولان پارازیتلر دئییرلر: اؤلوم شبحی آذربایجانین باشی¬اوستونده حرکتده¬دیر، هر طرفده گزیر.
دئدیکلری بو شبح اورموگؤلوندن قالخیر. اورموگؤلو، چوخ دوزلو بیر گؤل¬دور. و چون بوگؤله آخان سولارین قارشیسینی کسیبلر. گؤل سوسویوبدور. گؤل یانقی¬دیر. گؤل سوسودوقجا، یانقیلاشدیقجا آه چکیر. هر آهیندان بیر فیرتینا قالخیر! بو فیرتینالار گؤلون دوزلارینی گؤیه سوووُرور. زَهَرلی-دوزلو فیرتینالار، اؤز قانادیندا اؤلوم شبحی داشیـیـیر. گؤل سوسودوقجا، یانقیلاشدیقجا بو اؤلوم شبحی¬نین قارالتیسی آذربایجان اوزه¬رینده داها بؤیویور. اؤلوم شبحی بؤیودوکجه، آذربایجاندا بوتون جانلیلاری یعنی انسانلاری، قوشلاری، بیتکیلری، حیوانلاری، بؤجوکلری شدّت¬له اؤلوم تهلوکه¬سییله هده¬له¬ییر!
دوغرودور!
اورموگؤلو سوسودوقجا، یانقیلاشدیقجا؛ اؤلومه دوغرو گئده¬جک! اورموگؤلو اؤلدوکجه، آذربایجان دا اؤله-جک!
ایندی آذربایجانین جانی اورموگؤلونون جانینا، اورموگؤلونون جانی ایسه آذربایجانین جانینا باغلی¬دیر. بیری اؤلسه، او بیریسی ده اؤله¬جک!
آذربایجانا و تورک ملتینه ضد اولان پارازیتلر دئییرلر: اورمو گؤلو اؤلوبدور!
آنجاق من اینانمیرام! چون هله آذربایجان دیری¬دیر! و اگر آذربایجان دیری¬دیر؛ یعنی آذربایجانین وطن سئوه¬ر ملتچیلری ؛ یعنی آذربایجانیمیزین کئشیکچیسی اولان آذربایجان ملّی حرکتی ده دیری¬دیر!
گونئی آذربایجان ملی حرکتی، اؤز ملتینه گووه¬نه¬رک قادر دیر هم اورموگؤلونو احیا ائدیب، قورویوب، یاشاتسین! هم ده اورموگؤلونون قوُروماسینا باعث اولانلاری، قدرت¬له افشا ائدیب، اؤز یئرلرینده اوتورماغا مجبور ائتسین!
هر زامان، آذربایجان ملی حرکتی علیهینه اولان امنیتی باسقیلار دایاندیریلسا، بو حرکت قادر دیر گونئی آذربایجانین ماوی اورگی¬نین یاشام چیرپینتی¬سینی، نورمال بیر دوُروما گتیریب چیخارسین! سویونون حجمینی آرتیرسین و بوتون بؤلگه¬نی زَهَرلنمه¬دن قورتارسین!
سیزجه اورموگؤلونو نئجه قورتارماق اولار؟ بعضیلری دئییرلر:
1-اقتدار و اوروموگؤلونون قوروماسینا لاقئید اولان فارس شووینیزمی آذربایجان تورک ملتی¬نین منطقلی ایسته¬ک و مطالبه¬لرینه تمکین ائدیب، سدلرین قاپاغینی آچیب، کفایت قدر اورموگؤلونون سو پایینی تأمین ائتسین! بو هامینین خئیرینه¬دیر!
2- اگر اقتدار و فارس شووینیزمی تمکین ائتمه¬سه، کی، بوراجان اعتناسیزلیق ائدیبدیر؛ گونئی آذربایجان ملتی و ملی حرکتی مختلف یوللارلا شووینیزمی تمکینه گتیره بیلر. مثلا:
-¬بیلگینلر بیلیم¬سل و علمی باخیمدان اورموگؤلونون نییه قوُروماسی¬نین و نئجه احیا اولماسی¬نین مختلف یؤنلرینی آراشدیریب، بللی ائتسینلر.
-صنعتچیلریمیز شعر، ادبی قطعه و حکایه یازماقلا، موسیقی بسته¬له¬مک¬له، عکس، نقاشلیق و فیلم چکمه¬له، تییآتیر و نومایش یارادیجیلیغی ایله هابئله ژورنالیستلر رئپورتاژلار حاضیرلاماقلا و… اورموگؤلونون قورودولماسینی و گونئی آذربایجان تورک ملتیمیزین وارلیغی¬نین تهلوکه¬ده اولماسینی گوندمده ساخلاسینلار.
-تورک ملتچی آکتیویستلر سانال فضادان شهرلریمیزین خییابانلارینا قدر میداندا اولمالیدیرلار. اعلامیه یایماقلا، دیوار یازماقلا، مختلف مجادله و مباحثه¬لره قاتیلماقلا و خییابانلاردا اعتراض ائتمک¬له اورموگؤلونون قوُروما فاجعه¬سینی سسلندیرسینلر: هارای- هارای اورموگؤلو
-چئوره مسئله¬لری و اورموگؤلونون قوُروماسی ایله ایلگیلی، اولوسلار آراسی دایره¬لره جدی و آردیجیل مراجعت ائتسینلر و …
سیزجه نئجه؟ هانسی یوللارلا اورموگؤلونون قوروماسینین قاباغینی آلماق اولار؟
